توسدت الجرح

توسدت الجرح ماكتلك شسويت
يعصرني الالم واهمسلك تهنّه
تتكلب طفل وبحضن جرحي تنام
وامسد بيدي شعرك واحبس الونه
واكل لروحي بالج لايفز مرعوب
خليت الجرح غصبن عليه غنّه
كوّمت العمر ذبيته يم رجليك
واحس يطول عمري شماخذت منه
ونثرت احلامي كلهه بكاعك وتانيت
عيني اعله السحاب البيك يتدنه
واكولن ها اجه..ها بين من ابعيد..
ها زخت مطر..يغدي العمر جنه
ها..لحد ما كلبت كل حروف ال(الها)
صارت آه يمته الغيم اشمنّه
وادمنتك دمع يجري بسواجي الروح
وادمنتك امل ماكاطع الظنّه
ضحكة مستحه وفشله بحلك خسران
لو يضحك دهر مالايك ابسنه